Dalane Pada Ditutup, Wong Sing Pan Manjing Kota Tegal Kudu Nggawa Surat Kiyé

Penyekatan di perbatasan Kota dan Kabupaten Tegal, Rabu (7/7/2021). (Foto: Irsyam Faiz/PanturaPost)

TEGAL — Dalan-dalan nang Kota Tegal pada di sekat lan dijaga daning petugas polisi lan TNI. Upaya kuwe nggo mbatesi ruang gerak lan kegiatané masarakat wayah diberlakuknané PPKM Darurat.

Nggo warga luar kota sing pan nglinter lan manjing maring Kota Tegal, bisa nudukna surat keterangan vaksin. Warga uga bisa nggawa surat keterangan sing nudukna ari dhéwéké nyambut gawé nang Kota Tegal.

“Soalé kiyé sifaté nglakoni pembatasan pergerakané masarakat, mugané ana persyaratan khusus sing kudu bisa dhéwéké tudukna, kaya surat keterangan nyambut gawé, hasil vaksin, lan hasil rapid nggo ngliwati lan manjing maring Kota Tegal,” jaré Kapolres Tegal Kota AKBP Rita Wulandari, dina Rebo (7/7/2021).

Sadurungé, pihaké nglakoni penyekatan nang telung lawang manjing maring Kota Tegal. Total ana 13 titik penyekatan dalan termasuk sajeronéng kota sajegé dina Slasa (6/7/2021).

“Penjagaan pembatasan pergerakan diberlakukna molai 6-20 Juli 2021 karo nglibatna personél gabungan seka TNI-Polri sing jaga-jaga sasuwénéng 24 jam,” jaré Rita.

Titik penting sing ditutup yakuwé gerbang perbatesan Kejambon karo Kabupatén Tegal. Latané nang jalur dua Dukuhturi lan nang Dalan Hanoman sing batesan karo wilayah Mejasem Barat, Kecamatan Kramat.

“Kuwé yakuwé titik penting soalé batesan karo Kabupatén Tegal. Dadi dhéwék lakoni penyekatan nggo ngurangi pergerakané. Soalé angger dhéwék deleng khususé Kota Tegal lan Kabupatén Tegal angka pergerakan masarakaté ésih dhuwur,” ungkapé Rita.

Saliyané ke telu titik kuwe, polisi uga nglakoni penyekatan nang Dalan Werkudoro sing batesan karo Mejasem, Dalan Mayjén Sutoyo (Pos Maya), Dalan Dr Sutomo, Dalan dr Wahidin Sudiro Husodo (terminal bis).

Latané Dalan Yos Sudarso, Dalan Pemuda, Dalan Panggung Timur, Dalan Slamet Riyadi, Dalan Serayu, Dalan Merpati nang ngarepé kantor Damkar, lan Simpang 4 Langon Kelurahan Slérok, Kota Tegal. (*)

Comments are closed.