Brebes Lagi Mbutuhna Tenaga Medis Nggo Nangani Pasién Corona

BREBES — Bupati Brebes Idza Priyanti nyatakna, angger njeblugé kasus Corona nang Kabupatén Brebes nggawé tenaga médis nang pirang Rumah Sakit pada kwalahan. Saliyané kuwé, uga tenaga médis sing kekonfirmasi positif dhéwéké nglakoni isolasi mandiri (isoman).

“Saiki, Kabupatén Brebes mbutuhna 30 tenaga médis. Nggo ngindangi njeblugé kasus Corona nang Kabupatén Brebes, Pemkab Brebes luruh tenaga rélawan nggo ngréwangi tenaga médis. Saiki mbéké ana 10 tenaga sing gelem ngréwangi nggo nangani pasién Corona nang RSUD Brebes,” omongé Idza Priyanti lubar rapat koordinasi penanganan COVID-19 bareng forkopimda nang pendapa Bupati, dina Senén, 28 Juni 2021.

Dhéwéké nambahi, pihaké wis njaluk salah siji lembaga pendidikan keperawatan nang Brebes nggo njaluk mahasiswané sing énggal lulus nggo dadi tenaga rélawan. Dhéwéké mengkoné pan nggabung karo tenaga médis Rumah Sakit nggo nangani pasién Corona.

“Dhéwék wis ngebéll pihak Akper Al Hikmah 1 Benda. Soalé ana sekitaré 40 mahasiswa keperawatan sing pan lulus. Saorané dhéwéké bisa ngréwangi dadi tenaga rélawan. Dhéwék wis ngubungi lan muga-muga kiyé bisa nyepeti nggo nangani,” jelasé.

Saiki, jaréné, nembé ana 10 tenaga rélawan sing pan ngréwangi nangani pasién Corona nang RSUD Brebes. Padahal, dhéwéké ngomong, pirang-pirang Rumah Sakit nang Brebes uga mbutuhna tenaga médis.

Pihaké ngaku wis mbuka rékrutmen tenaga keséhatan. Tapi faktor wedi nangani pasién Corona, nggawé calon tenaga kerja kiyé mundur.

“Nggo tenaga rélawan kiyé senajan ana faktor wedi, tapi dhéwéké wis disangoni ilmu sasuwénéng pendidikan. Dhéwéké uga ngarti kepribén cara nyambut gawé nangani pasien Corona,” jelasé.

Saliyané tenaga médis, Bupati uga njaluk tambahan stok oksigén cair lan obat-obatan maring Provinsi merga stoké selot nipis.

“Dhéwék wis ajukna 5.000 liter oksigén cair lan obat-obatan, soalé stoké wis nipis. Dhéwék wis sampékna kondisi hal kiyé maring Dinkes Provinsi,” omongé.

Jaréné Diréktur RSUD Brebes, Rasipin, penambahan tenaga médis kiyé cukup ndesak soalé wis ana 15 prawat RSUD Brebes sing wis kekonfirmasi positif Corona lan nglakoni isolasi mandiri. Pihaké ya wis mbuka rékrutmen lan olih 12 wong sing lamar kerja dadi tenaga keséhatan.

“Tapi sawisé dhéwéké ngarti pan nangani pasién Corona, dhéwéké ngundurna diri. Kiyé pancén perlu disampékna maring calon tenaga médis kiyé, ébén dhéwéké bisa nyambut gawé ora ana paksaan,” omongé dr Rasipin. (*)

Comments are closed.